ug gipatay nako si drew jarddy

miabot ka sa akong tanaman,
way nakahibawo.
buot kon nang patyon ang patayng ikaw,
way makahibawo.

kini baya ang unang hitabo
nga giingon ani nako
pagtan-aw ang imong hulagway;
nga basin hanap nang panagway
ang akong masud-ong
sa mga sunod nga adlaw.

patyon tika kay bag-ohon nako
ang karaan ug bati nga ako
ngadto sa usa ka tawo
nga makamaong makiglumba sa dagan
sa milo marathon 2009 nga imong gihiwaan.

bisan wa ka kahibawo, pahibaw-on tika:

nagpasalamat kog dako
nga naugmad nako ang bag-ong ako
tungod ra usab ning kagahapon nga gitunglo.

way utang-buot nga pasalamat

[oktubre 7, 09]

lisod sulbaron ang tanghaga,
ako na lamang yawyawon:

ang upat ka buwan
nga pagkuyog-kuyog--usahay dili--
ta diri ning dalan ni komsai oble
nahimong agianan sa pagtanom,
pagturok, pagsalingsing
apan wa mogamot nga pagbati
nako kanimo.

ambot asa nang purgaturyoha ka
nahimutang ning orasa, adlawa, semanaha
gibutang sa imong kaugalingong tunob.

maglingo-lingo kong pangutan-on
asa ka nahimutang.

usa kini sa akong kagahapon
nga di nako mapapas ug papason:
ang imong yagit na ikaw
mas maayo sa ulitawong ikaw.

gibalikan ang kanhing bangaw

[septiyembre 17, 09]

maglibog kog sabot
sa tanghagang
way tubag:

amang. oo, usa siya
ka amang
nga di kamaong
mopagawas
sa mga pulong
gikan sa iyang baba.
pamasin kuno niya,
di ra gihapon
nako tuohan
iyang hiwing rason.

kon sauna
malipay kong
magsud-ong
sa iyang nawong,
karon dili na;
maglagot na.

galagot ko
sa iyang gibuhat:
kinsa bay amawng
'naningkamot'
nga di motunga
sa iyang
'gipaningkamotan'?

--pagkataphaw
--bang pamalandongon.

sugod karon
mao na lamay
akong inspirasyon
ang akong
kanhing bangaw
nga akong gibiyaan
sa akong karaang tunghaan.

hinuon, pamasin-basin
lamang kini
kay utro pod tong
amaw.

ug mibalik ang bagyo

[septiyembre 10, 09]

nagmaya
ang akong kasingkasing
dihang mitagad, mikatawa
siya nako:
hinungdan
nganong mibalik
ang bagyo
sa pagkuso-kuso
sa isla.

ang bangaw
god wala mawala
sa akong panan-aw:
kusog kaayo
ang uwan ug hangin
bunga
sa bagyo.

malingaw gihapon
kog sud-ong
sa iyang gangising nawong,
kita ang puting mga ngipon
ug piyong ang duha ka mata--
daw may anghel
sa akong dunggan
gadungag awit,
nakigduwa sa akong kasingkasing
dinhi sa paraiso
nakong dughan;
bisan kusog ang bagyo,
wa gihapon maguba
ang akong giampingang
taytayan.

hangtod karon,
ang bangaw
ako gihapong masud-ong
sa kisame
sa akong boarding house.

ug mitunga na ang adlaw sa akong langit

[septiyembre 9, 09]

gisuwat niya sa papel
ang sayop nga ngalan--
drew jardy--
nga akong gisuna
nga sayop,
apan wa nako sultihi
sa sayop.
mikatawa, mingisi
iyang ngabil
dihang dunay miingon
sa sm nga ngalan
kini sa akong kasaring.

nahilom ako,
naamang.

wa ko ba magdahom
nga si john lloyd
ang mahinungdan
nganong mahibaw-an
niya ang akong sekreto.

na-yoyo ko:
namuwa akong dagway
bisan way nakabantay.

giliko nako ang padulngan
sa sakyanan.

nagbasol na hinuon ako
karon sa akong gibuhat:
padayong
gasamok-samok
sa akong galamhan
ang sayop
nga espeling
sa iyang ngalan--
drew jardy...
drew jarddy...


..ang anagrama
sa way ayong
higala..

paglurang sa unos

[septiyembre 10, 09]

ang akong bagyo
nga mikuso-kuso sa usa ka isla
mihulpa na:
milurang na ang unos
sa iyang pagtamas-tamas
sa inosenteng isla.

mipakita na
ang tinuod nga adlaw:
akong naamgohan
nga basig sa kataposan
ako ra ang mabasol
sa pagguba
sa taytayan sa isla.

nasayop ko
sa pagdahom nga way makahibalo
sa anagrama
sa kabuang sa akong utok.

mao kini ang hinungdan
nganong di na lang nako
samok-samokon ang putling isla--
basin ako ra unya
sa kataposan
ang mabasol
sa pagkaguba
sa taytayan sa isla.

babay, mopanaw na ako.
palayo sa isla.

mipahiyom ang masulub-ong anino

[septiyembre 8, 09]


ang adlaw
mipagilak sa ariyos
sa iyang dunggan.

iyang anino
mipatin-aw
sa kimpang
kong kabuntagon.

bitbit gihapon niya
iyang N7 nga kinabuhi.

mitago lang ang adlaw
dihang way migilak
nga ariyos sa tunga
sa kalibotan.

bisan hapon,
mao pay pagsubang sa adlaw.
gadagan-dagan
ang lubot-sa-ayala.

unsay akong isulti niya?

[septiyembre 7, 09]

ang tawong nahanaw
pila na ka adlaw
sa akong kinabuhi
gusto nakong mabuhi.

kay siya mipanaw,
unta mabanhaw.

iyang anino
layo na sa akoa.

bisan mag-uwan,
maytag magkaduol gihapon
among duha ka anino.

segurado akong kon kana mahitabo
may motumaw nga bangaw.

p.s.
maayo untag
magtinarong siya
sa iyang hiwing kinabuhi.

ang hagdan nga akong gisak-an

ang imong pagkahanaw
sa akong matag adlawng panaw
usa ka dakong butang:

panaghap nako
nganong naingon ana ka
mao kini:

adunay usa ka bakukang
nga misulod sa imong alimpatakan,
o basin adunay alimatok
mihigop sa imong paminsar
maong naingon ana ka karon:
usa ka tapolang linalang.

wa ka maliwat
sa imong ginikanan.

nabalaka na sab baya ko nimo
kay nasuod na baya ta--
ikaw akong higala.
gani, gitambagan na naman tika.
maayo kaayo kong naminaw
ug mitubag sa akong pangutana:
imo rang ipalapos unya sa pikas dunggan
ang akong hinigalang tambag.

tingali gasalig ka
nga milampos ka
sa imong kanhing dalan
bisan ingon ana ra ka--
kon ingon ana ba gayod ka.

ayaw bayag itag-ing
ang duha ka lahing kalibotan.

kini bayang hagdan nga imong giagian
kon di ka manghawid
matagak gayod ka.

unsa man,
pangutan-on tikag balik,
tubaga ko:

mithi ba gayod nimo
ang pagsaka sa sunod andana
gamit ning imong gisak-ang hagdan karon?

unta, unta lang
di ka motipas sa laing hagdan.

ang gidamgong kabaw

unsaon paghigot sa kabaw
kon gainom kag coke sakto
nga gipalit nimos brown gate?

una:
kon magyawyaw ang buang,
tunga bahalag di maminaw.
hatagan ka niyag peso, way dawo-dawo.

ikaduha:
kon maghata'g pinuti ang kalog
tagod-tagora imong kaugalingon.
manghatag siyag peso, segurado na.

ikatulo:
kon magpinusilay na ugma,
pagpraktis ug pagda'g armas.
laing peso sab na.

ikaupat:
kon magdaob ang mga higala,
apil! ayaw kahadlok nga mapaso ka.
peso ihatag sab nila.

ikalima:
kon buhi ka niadtong gauwag peso,
saw-a ug isulod sa bolsa.

nan, aduna ka kay singko:
ipalit og coke sakto
ang kabaw maoy paimna.
motuo dayon siya nimo,
magpahigot na bisan asa.

dayon lukso sa langit:
kay nahigot na nimong kabaw!

ang pag-ampo sa daotag mata

aduna koy higala miingon kanako
sa way pagduha-duha:
'di ko moatras sa hagit.
padayonon nako akong panaw.
molangyaw ako.
magmalipayon.'

midayeg ako niya
taman sa langit
nagdahom nga siya usab
usa ka langit
nga di nako maabot
apan napakong ako:
nakaamgong damgo lamang
akong gipanulti,
ug siya dili langit.

kapila siya
sa akong panan-aw
mahanaw, mobalik, mawala
daw daotan akong duha ka mata:
hanap iyang bayhon
sa akong panumdoman.

maong wa na lang ako magdahom
nga sa samang panaw kami magkauban:
lahi among dalan
nga giagian.

kon ugaling magkasakay man mi
aning biyahe sa kinabuhi--
pananglitan lang--
magbahag gatas ang tibuok kalibotan.

ug ang bangaw di mawala sa akong panan-aw.

duha ka pampalibog sa facebook

[agosto 17, 09]

nagpailad ko.
ug pabiling magpailad nimo.
ambot unsay naa nimo, uy!
mosugot ra man kong tikasan.
ok ra kong ilaron.
di ra ko masuko. kahibawo ka,
di baya ko ingon aning tawo:
dali ra kong masuko.
daghan na man gani kong
nakaaway kay igihan ko.
imo gyod kong giusab.
hinuon, di ikaw ang unang
nakapausab nako.
ambot gani kon sa positive infinity
ba ni o sa negative infinity.
paita sad aning
akong kinabuhi, uy:
bisan galisod nag lingkod
mosugot ra gihapong sandigan,
bisan hapit nang matagak
mosugot ra gihapong gunitan.
asus! maytag makamata nako
aning akong damgo.

apan, ayaw diay usa.

unya ra.

ug ako naigo sa pana ni kupido

maglisod kog sabot sa imong balak
daw tanghaga nga misamok sa akong galamhan.
dili man unta lawom ang mga pulong nga imong gigamit
ugaling lang iyang kahulogan di nako madakop.

sama sa langgam imong balak
habog na ang iyang lupad sa langit.
di na nako madakop ang ikog ug hanap na ang iyang dagway
bisan pa man madungog gihapon nako ang iyang huni.

kon unsa may kahulogan anang imong balak
ayaw lang intawon isulti nako.
ipakita lang ang tinuod niyang dagway
aron akong mabasa ang basahon nga di masabot.

sa dihang ang nido ug milo misawom sa nescafe

di baya ni pait nga nescafe ha.
itom lang. ambot gani
nganong nescafe akong gitawag ani.
imbes boracay among adtoan,
nagkape na man lang hinuon mi
sa lugar sa mga ungo.
di man unta ko maligo,
mosawom sa nescafe.
si milo man god, pun-an
pa nilang uban nga
nalangit sa paghigop sa kape:
nadani gyod ko, nailad.
pastilan! nahinayak gyod kog
inom sa itom nga langit.
wa gyod ko kasabot
unsay lami atong panahon
nga nagsagol ang nido, milo
ug nescafe. tam-is man seguro
ang nescafe. oo, paminaw nako
tam-is gyod to. napaakan
pa ganig hulmigas ang
akong kasingkasing.
ug, bisan samdan pod ang tiil,
nalangit man ko.

apan karon mibalik na kos impiyerno.

pangaliya ngadto niya

kon ikaw wala:

ako sama sa sorbetes
malanay. di dapat ibuwad
sa init. dapat daliog
kaon.

kon ako lanay:

mawala akong kaisog
sa pagsanong sa hagit
sa kalibotan.
di ko kahibawo
moayo sa akong
nahilis dagway.

--ayaw na lag suwayg
--buhi sa posas nga gihigot
--nako nimo. maluoy ka.
--maluoy ka.

unang esena sa kahiubos

i. init nga adlaw

nakit-an nako
imong anino--
imo gyod tong anino--
naglakaw paingon nako.
paduol sa akong gilingkoran.
ako gatalikod nimo.
apan kaila ko sa imong anino.
segurado akong imo gyod to.
mokulba man god akong dughan.
maglisod kog ginhawa.
kon moduol ka nako.

kalit lang milandong-- mipahuway
si haring adlaw.
nawala imong anino
apan padayon gihapon
ang kulba sa akong dughan.
naglagubo na.

nawala ra dihang
nadunggan nako
imong langitnong tingog
nakig-estoryag lain.

ug miuwan-- og kusog
ang langit.

nailad sa mangingilad nga wa mangilad

buta gyod ko. peryod.
paita aning kinabuhia:
di makakita.

makakita na ko. peryod.
unsa man ni:
kahayag?

ikaw diay na. peryod.
naunsa na ko:
nabuang nimo.

basta ikaw. peryod.
hala uy:
mamahimo na kong mamatay.

ambot ani. peryod.
unsaon ko ni:
hayag akong kagabhion.

kahibawo nako. peryod.
lingawon tika:
higalaon ug panggaon.

laing anino sa panaghinigala

awayon tika ha.
anad na bitaw ka.
aylang kasuko nako.
binuang ra ning ako.
pakatawa ba.
apil lang god.
katawa sad.
maglingaw lang ta.
wa ko magdaot nimo.
gusto lang kog binuangay.
lingaw man god.
sige lang.
ayaw sad baya pangluod.
pagbinuang sad god.
mosugot ra ko.
ikaw pa.

basta awayon tika ha.
ayaw gyod baya kasuko nako.
wa koy planong daotan.
hinigala ra ning ako.
pakatawa sa kasingkasing.
lingaw baya.
gilok kaayo.
kataw-anan.
apil lang god.
basta ha.

awayon gyod tika.
aylang gyod kasuko.

ikaw

ikaw
ang buwan
sa akong kagabhion
modalit og kahayag
sa akong
mangitngit kagabhion.

ikaw
ang bituon
sa akong langit
mopabati kanako
may usa ka hayag suga
sa akong
gilaktang dalan.

ikaw
ang adlaw
sa akong pagmata--
mopatin-aw sa akong
hanap kagabhion:
mopamatuod
naa kos
saktong dalan.

ug
labaw sa tanan:

ikaw
akong mapa
mogiya kanako
asa nako punta
nasaag na ako
sa imong
kasingkasing.

gitak-opang kasingkasing

binilanggo akong kasingkasing
sa lata sa sardinas;
isda akong kasingkasing
nga gitagana sa umaabot;
di pa ablihan ang lata
may lain pang sud-an sa lamesa;

may usa ka iring gigutom
udto na apan wa pa makapamahaw;
nangitag isda sa lamesa
apan way usang nakita;
nakit-an ang lata sa sardinas
gikitkit apan napangag iyang ngipon;

pakyas siya sa iyang plano
iyang mga ngipon sa pag-abli di paigo

ang buwak nga dili ako

di siya ang pinakamatahom
nga buwak sa tanaman
apan maoy nakapailad nako.
may kahumot siyang
makapadani sa ni kinsang
mosuwayg simhot.
iyang bulok milutaw
sa walang buwak sa tanaman.
di kadudahan nganong
daghang gustong mokutlo niya.
apan wa niya tugti
ang ni kinsang kamot
nga nagplanong moangkon niya.
hinungdan nganong pabilin
gihapon ang makadaning kahumot
sa pagkayab sa tibuok tanaman.

ako na lamang siyang galamon
aron magpabilin iyang alimyon.
di ko kapuyag bubo niya matag buntag
di ko pul-ag sud-ong sa iyang dagway
kay siya ang hinungdan sa akong katawa
bisan adunay problema,
kay siya ang hinungdan sa akong pagmata
bisan gaduka,
kay siya ang akong inspirasyon
sa padayon nakong pagpanaw aning kalibotana.