duha ka pampalibog sa facebook

[agosto 17, 09]

nagpailad ko.
ug pabiling magpailad nimo.
ambot unsay naa nimo, uy!
mosugot ra man kong tikasan.
ok ra kong ilaron.
di ra ko masuko. kahibawo ka,
di baya ko ingon aning tawo:
dali ra kong masuko.
daghan na man gani kong
nakaaway kay igihan ko.
imo gyod kong giusab.
hinuon, di ikaw ang unang
nakapausab nako.
ambot gani kon sa positive infinity
ba ni o sa negative infinity.
paita sad aning
akong kinabuhi, uy:
bisan galisod nag lingkod
mosugot ra gihapong sandigan,
bisan hapit nang matagak
mosugot ra gihapong gunitan.
asus! maytag makamata nako
aning akong damgo.

apan, ayaw diay usa.

unya ra.

ug ako naigo sa pana ni kupido

maglisod kog sabot sa imong balak
daw tanghaga nga misamok sa akong galamhan.
dili man unta lawom ang mga pulong nga imong gigamit
ugaling lang iyang kahulogan di nako madakop.

sama sa langgam imong balak
habog na ang iyang lupad sa langit.
di na nako madakop ang ikog ug hanap na ang iyang dagway
bisan pa man madungog gihapon nako ang iyang huni.

kon unsa may kahulogan anang imong balak
ayaw lang intawon isulti nako.
ipakita lang ang tinuod niyang dagway
aron akong mabasa ang basahon nga di masabot.

sa dihang ang nido ug milo misawom sa nescafe

di baya ni pait nga nescafe ha.
itom lang. ambot gani
nganong nescafe akong gitawag ani.
imbes boracay among adtoan,
nagkape na man lang hinuon mi
sa lugar sa mga ungo.
di man unta ko maligo,
mosawom sa nescafe.
si milo man god, pun-an
pa nilang uban nga
nalangit sa paghigop sa kape:
nadani gyod ko, nailad.
pastilan! nahinayak gyod kog
inom sa itom nga langit.
wa gyod ko kasabot
unsay lami atong panahon
nga nagsagol ang nido, milo
ug nescafe. tam-is man seguro
ang nescafe. oo, paminaw nako
tam-is gyod to. napaakan
pa ganig hulmigas ang
akong kasingkasing.
ug, bisan samdan pod ang tiil,
nalangit man ko.

apan karon mibalik na kos impiyerno.

pangaliya ngadto niya

kon ikaw wala:

ako sama sa sorbetes
malanay. di dapat ibuwad
sa init. dapat daliog
kaon.

kon ako lanay:

mawala akong kaisog
sa pagsanong sa hagit
sa kalibotan.
di ko kahibawo
moayo sa akong
nahilis dagway.

--ayaw na lag suwayg
--buhi sa posas nga gihigot
--nako nimo. maluoy ka.
--maluoy ka.

unang esena sa kahiubos

i. init nga adlaw

nakit-an nako
imong anino--
imo gyod tong anino--
naglakaw paingon nako.
paduol sa akong gilingkoran.
ako gatalikod nimo.
apan kaila ko sa imong anino.
segurado akong imo gyod to.
mokulba man god akong dughan.
maglisod kog ginhawa.
kon moduol ka nako.

kalit lang milandong-- mipahuway
si haring adlaw.
nawala imong anino
apan padayon gihapon
ang kulba sa akong dughan.
naglagubo na.

nawala ra dihang
nadunggan nako
imong langitnong tingog
nakig-estoryag lain.

ug miuwan-- og kusog
ang langit.

nailad sa mangingilad nga wa mangilad

buta gyod ko. peryod.
paita aning kinabuhia:
di makakita.

makakita na ko. peryod.
unsa man ni:
kahayag?

ikaw diay na. peryod.
naunsa na ko:
nabuang nimo.

basta ikaw. peryod.
hala uy:
mamahimo na kong mamatay.

ambot ani. peryod.
unsaon ko ni:
hayag akong kagabhion.

kahibawo nako. peryod.
lingawon tika:
higalaon ug panggaon.

laing anino sa panaghinigala

awayon tika ha.
anad na bitaw ka.
aylang kasuko nako.
binuang ra ning ako.
pakatawa ba.
apil lang god.
katawa sad.
maglingaw lang ta.
wa ko magdaot nimo.
gusto lang kog binuangay.
lingaw man god.
sige lang.
ayaw sad baya pangluod.
pagbinuang sad god.
mosugot ra ko.
ikaw pa.

basta awayon tika ha.
ayaw gyod baya kasuko nako.
wa koy planong daotan.
hinigala ra ning ako.
pakatawa sa kasingkasing.
lingaw baya.
gilok kaayo.
kataw-anan.
apil lang god.
basta ha.

awayon gyod tika.
aylang gyod kasuko.

ikaw

ikaw
ang buwan
sa akong kagabhion
modalit og kahayag
sa akong
mangitngit kagabhion.

ikaw
ang bituon
sa akong langit
mopabati kanako
may usa ka hayag suga
sa akong
gilaktang dalan.

ikaw
ang adlaw
sa akong pagmata--
mopatin-aw sa akong
hanap kagabhion:
mopamatuod
naa kos
saktong dalan.

ug
labaw sa tanan:

ikaw
akong mapa
mogiya kanako
asa nako punta
nasaag na ako
sa imong
kasingkasing.

gitak-opang kasingkasing

binilanggo akong kasingkasing
sa lata sa sardinas;
isda akong kasingkasing
nga gitagana sa umaabot;
di pa ablihan ang lata
may lain pang sud-an sa lamesa;

may usa ka iring gigutom
udto na apan wa pa makapamahaw;
nangitag isda sa lamesa
apan way usang nakita;
nakit-an ang lata sa sardinas
gikitkit apan napangag iyang ngipon;

pakyas siya sa iyang plano
iyang mga ngipon sa pag-abli di paigo

ang buwak nga dili ako

di siya ang pinakamatahom
nga buwak sa tanaman
apan maoy nakapailad nako.
may kahumot siyang
makapadani sa ni kinsang
mosuwayg simhot.
iyang bulok milutaw
sa walang buwak sa tanaman.
di kadudahan nganong
daghang gustong mokutlo niya.
apan wa niya tugti
ang ni kinsang kamot
nga nagplanong moangkon niya.
hinungdan nganong pabilin
gihapon ang makadaning kahumot
sa pagkayab sa tibuok tanaman.

ako na lamang siyang galamon
aron magpabilin iyang alimyon.
di ko kapuyag bubo niya matag buntag
di ko pul-ag sud-ong sa iyang dagway
kay siya ang hinungdan sa akong katawa
bisan adunay problema,
kay siya ang hinungdan sa akong pagmata
bisan gaduka,
kay siya ang akong inspirasyon
sa padayon nakong pagpanaw aning kalibotana.